Коми культуралӧн восьса ӧдзӧсъяс лунъяс дырйи Эжва районса администрация да Эжваса коми культура шӧрин нуӧдісны челядь творчестволы сиӧм «Катшасин» фестиваль, кытчӧ пырӧдчисны сизим школаӧдзса учрежденньӧ.

«Таво выль нога вӧчим: фестивальсӧ нуӧдысьясыс вӧліны коми мойдса геройясӧн, а сюжетыс – этнотуристическӧйӧн, да йитчӧма Эжва районлӧн тшупӧда паскӧд» – висьталіс Эжваса коми культура шӧринӧн художествоа веськӧдлысь Елена Иванова.

Фестивальын «Шылада медбур петкӧдчӧм» нимпас шедӧдіс 83 №-а челядь видзанін, «Режиссёрлӧн медбур удж» нимпас – 68 №-а челядь видзанін, «Аслыспӧлӧс йӧктӧм петкӧдлӧм» нимпас – 105 №-а челядь видзанін. «Национальнӧй традицияяс видзӧм да сӧвмӧдӧм» нимпасын пасйӧма № 89 №-а челядь видзанін, «Тувсовъя композиция» нимпасын – 103 №-а челядь видзанін. «Тшупӧда паслы сиӧм медся аслыспӧлӧс театрса композиция» нимпас босьтіс 106 №-а челядь видзанін, «Тувсовъя сьыланкыв ӧтчукӧрӧн сьылӧм» нимпас – 26 №-а челядь видзанін.

Елена Иванова пасйис, мый быд во фестивальӧ пырӧдчысьяс петкӧдчӧны мича паськӧмӧн, петкӧдлӧны коми кыв тӧдӧм, а Эжва районса кагульнича да шылада веськӧдлысьяс отсӧгӧн сӧвмӧдӧны коми ру.

Енбиа дзолюкъяслы вичмисны дипломъяс да юмов козинъяс.

коми