Гаж вылӧ локтысьяслы вӧлі лӧсьӧдӧма ворсан уджтас, йӧктан котыръяслӧн петкӧдчӧмъяс да «Сыктывкарса лыжня» конкурсӧ пырӧдчысьяс пӧвстын вермысьясӧс бӧрйӧм.

Кӧрт туй вокзал сайӧ воисны 250 гӧгӧр морт. Челядь видлісны ассьыныс вынсӧ унасикас вермасьӧмын. «Сыктывкарса лыжня» спорт конкурсӧ пырӧдчысьяс пӧвстын нуӧдісны лотерея. Казьтыштам, медым пырӧдчыны конкурсас да шедӧдны козин, колӧ вӧлі ӧшым тӧлысь 1-ӧд лунсянь косму тӧлысь 1-ӧд лунӧдз 15-ысь либӧ унджыкысь котӧртны вит либӧ дас километра.

Сыктывкарса администрацияысь физическӧй культура да спорт управленньӧса начальник Михаил Дудников аслас чолӧмалан кывйын висьталыштіс «Сыктывкарса лыжнялӧн» бурдӧдан вын йылысь. Та бӧрын сійӧ наградитіс конкурсӧ уна во чӧж пырӧдчысьясӧс. 2018 воын 50 морт дасӧдыс нин пырӧдчисны «Сыктывкарса лыжняӧ», мыйысь налы вичмис казьтылана статуэткаяс. Татшӧм жӧ козин сетісны 80 арӧсысь ыджыдджык сизим лыжниклы, на лыдын 91 арӧса Николай Князев да 87 арӧса Галина Шехурина.

Ставнас конкурсӧ пырӧдчисны 1500 гӧгӧр морт; 945-ыс колана мындаысь котӧртісны дистанциясӧ, на лыдын 600-ӧн – 10 километра.

Вӧлі разӧдӧма 220 козин: киноӧ да гажӧдчан шӧринъясӧ билетъяс, спорт вузасянінъясӧ да спорт учрежденньӧясӧ эскӧданпасъяс, бытовӧй техника, лыжи да мукӧдтор. Конкурсын вермысьяслы, коді эз удит волыны, позьӧ матыстчыны козинъясысла спорт мероприятиеяс нуӧдан шӧринӧ (Первомай ул., 74 керка, пыраніныс боксяньыс). Кутшӧм карточка номеръяс вылӧ усисны козинъяс, верманныд тӧдмавны 200–164, 200–174 телепон номеръяс пыр.

коми