Юркарын помасис удж сикас кыпӧдан «Россияын тавося кагульнича» ставроссияса конкурслӧн муниципальнӧй тшупӧдыс – «2019-ӧд вося Кагульнича».

Дас вит пырӧдчысь ордйысисны 5 вермасьӧмын: петкӧдлісны асьсӧ методика уджын да челядькӧд йитӧд лӧсьӧдӧмын.

«Сыктывкар» каркытшса веськӧдлысь — администрацияӧн юрнуӧдысь Валерий Козлов пасйис, мый конкурс отсалӧ кыпӧдны Сыктывкарса школаӧдзса велӧдчанінъяслысь пайсӧ да сӧвмӧдны педагогъяслысь творческӧй сямсӧ. «Ме аттьӧала тіянӧс сьӧлӧмсянь уджалӧмысь, шоныд да кыпыд руысь, мый лэбалӧ тіян челядь видзанінъясад, радейтӧмысь, мыйӧн юксянныд дзолюкъясныдкӧд. Вермысьлы ме сиа бура петкӧдлыны юркарнымӧс регион тшупӧдын, а конкурсӧ став нылыслы — шуд, уджын вермӧмъяс, муслун да тыр-бур олӧм»,— тӧдчӧдіс юркарса мэр.

Сыктывкарса конкурсын медбурӧн таво лоис 107-ӧд №-а челядь видзанінысь кагульнича Ольга Шмидт. Сылы сетӧма диплом да 15 сюрс шайта эскӧданпас. Мӧд места шедӧдысь Ольга Плесовскаялы вичмис диплом да 10 сюрс шайта эскӧданпас. Коймӧдӧн лоис Наталья Рассыхаева, кодлы сетісны диплом да 7 сюрс шайта эскӧданпас. Конкурсын петкӧдчысьясӧс сідзжӧ пасйисны мукӧд нимпасын.

«2019-ӧд вося Кагульнича» муниципальнӧй конкурсын вермысь Ольга Шмидт кутас дорйыны юркарлысь нимсӧ республика тшупӧдын, кӧні видлас вынсӧ, медым пырӧдчыны ставроссияса конкурсӧ.

коми