Йӧзкостса гаж Сыктывкарын нуӧдасны рака тӧлысь 9-ӧд лунӧ.

Степан изэрдын 10-сянь 17 часӧдз кутасны вузасьны, кӧні позьӧ ньӧбны пӧжас, юанторъяс, ма, чачаяс, шашлык да пӧткӧдчыштны блинъясӧн.

12-сянь 16 часӧдз дасьтӧны концертасян уджтас. Петкӧдчасны сьылысь да йӧктысь котыръяс, а сідзжӧ «Power of Fire» би да цирк искусствоса театр. Сценасянь карсаясӧс гажӧдасны «Зыряночка» йӧзкостса йӧктан котыр, «Сполохи» да «Греннис» йӧктан котыръяс, «Русская гармонь» ансамбль, «Тулыс» йӧзкостса хор, «Модницы» да «Лайк» студияяс, «Волна» культура керкалӧн «Барыня» сьылан котыр да «Журавушка» хор, «Продвижение» йӧктан котыр, Веры Булышевалӧн «Войтъяс» школа-студия, «Зарни туис» йӧзкостса сьыланкыв котыр. Кытшӧн ворсана сьыланкывъясӧн тӧдмӧдас «Студия радости» котыр.

Степан изэрыд челядьлы да верстьӧлы лӧсьӧдасны аттракционъяс, карусельяс, коми вӧралан ворсӧмъяс, фотозона; позьӧ рӧдтыштны вӧлӧн, журъялыштны электромобильӧн. Та кындзи, быдӧн вермас пырӧдчыны спорт ворсӧдчӧмъясӧ – кӧв кыскалӧмӧ, гира лэпталӧмӧ – да шедӧдны козин да эскӧданпас.

Дас куим часын «Сыктывкар» каркытшса веськӧдлысь — администрацияӧн юрнуӧдысь Валерий Козлов чолӧмалас карсаясӧс гажӧн да восьтас «Сюръя» аттракцион: тані быдӧнлы позяс петкӧдлыны ассьыс пельклунсӧ да кавшасьны 20 метраа сюръя йылӧ, кӧні козин пыдди лоас бытӧвӧй техника.

Гажлӧн тӧдчанаторйӧн лоас йӧввыв гажса медбур полӧкалӧ вылӧ конкурс. 15.30-ын сотасны Гажа Йӧввывлысь полӧкалӧсӧ, мый петкӧдлӧ тӧвлысь помасьӧмсӧ да тулыс воӧмсӧ.

Медым тыр-бура котыртны гажсӧ, недыр кежлӧ тупкасны Ленин улича (Куратов уличасянь Бабушкин уличаӧдз), Коммунистическӧй (Советскӧй уличасянь Интернациональнӧй уличаӧдз) да Интернациональнӧй уличаяс (133-ӧд керкаасянь Коммунистическӧй уличаса 10-ӧд керкаӧдз, Ростелеком водзын сувтанін). Коланаинын сувтӧдасны недыр кежлӧ туй пасъяс.

Та кындзи, рака тӧлысь 10-ӧд лунӧ гажӧдчӧмъяс мунасны Сыктывкарса Эжва районын, Гӧрд Затон, Вылыс Максаковка да Сьӧдкыркӧтш посёлокъясын.

Степан изэрдын гажӧдчан уджтас:

12:00 – 16:00: Шӧр сцена, концерт, интерактивнӧй ворсӧмъяс, полӧкалӧ конкурсысь диплом да козинъяс сеталӧм;

13:00 – 15:00: «СЮРЪЯ» аттракцион;

12:00 – 15:30: Спорт ордйысьӧмъяс, ворсӧмъяс, посни козинъясӧн ышӧдӧм;

12:00 – 15:30: Челядьлы да верстьӧлы ворсан уджтас, посни козинъясӧн ышӧдӧм;

11:00 – 16:00: «Карусель» аттракцион;

11:00 – 16:00: «Качели» аттракцион;

11:00 – 16:00: Ыджыд аканьяс петкӧдлӧм;

11:00 – 15:00: «Полӧкалӧ» конкурс;

15:00: «Полӧкалӧ» конкурс серти кывкӧртӧд вӧчӧм;

15:30: Медшӧр полӧкалӧ сотӧм;

10:00 – 17:00: Вузасянінъяслӧн удж.

коми